Kiapact anotc acokeparinaniwon Bostonnais sipi neta acokanik Ducharme.

CIPA ACOKANIK

E micta mitceki sipia ota Haute-Mauricie askik ekoni wetci micta mitcetitcik acokanak papitoc e aicinakositcik. E wetak kitci icaniwok akamik sipik ekoni wetci ki pe itatikaniwok ota nac kitci iti mitceki otenowa. Ki wetan kitci awotasonaniwok kaie kaskina wiec e wi icaniwok. Ki miro apatisiwok acokanak.

Acokan Saint-Maurice sipi e acokeparinaniwok 1917-1918.

Ka mapiskitik nipi ke macikowik.

Ki miro apatisiwok acokanak kitci ki micta corÏakaniwok, mitowi acokan « Rive-Ouest » 1910 ka ocihatcik « Brown Corporation » ka icinikatek kitci ki aicitasonaniwok neta asko « l’usine à papier ». Ka ocihakaniwitc naha acokan ki witcihiwemakan e itapiskititakaniwok nipi ke itacikowik nac « à l’usine » neta tca sakihikanik « Parker » e otacikowik.

1968 ka tatopiponikak naha acokan Saint-Maurice sipik ka tatc aci La Tuque oteno tiperimepan peikwapiskw tepirak e ki kicikwatc. Kiapatc anotc kata ki miparino, papeikw tepirak, otapana, matci micta otapan « moto », « quads » acitc skito.

Nama akwapitew aka e takok ickote

Ki kiskeritetai a 50 % irikik e tatcik acokanak ka akonapwecinitcik Québec askik? Kirowe mitcetiwok patok kaskina wiec Canada askik. Ka iti kitci ocki piponikak 1900 nac 1958, awocamec 1 000 acokanak ka akonapwecinitcik ki ocihakaniwok Québec askik. Ekota neta acokanik e otci nokok e misikitaikw nihe « patrimoine » ka icinikatek. Niki acokanak micta manatcihakaniwok. Ki akwaskahikatew micta masinahikana e otcihiwaniwok kitci sakosaniwok acitc pekatc ki motehakaniwitcik atikok e acokaniwok. Nama sa kinec kitci ocikohonaniwok!

Atisoka

Kecpin aka aci 100 tacitcik aniki mitowi acokanak ota Québec askik, nete « La Bostonnais » itekera niciwok aniki mitowi acokanak : « Ducharme » acitc Thiffaut. 1946 ka cenakaniwitc acokan Ducharme 2006 tca « monument historique » ki itirakaniwiw enkona kirawe ka mirowinakaniwitc ota Québec askik osam mitowi « Town Québécois » e ki icinakohakaniwitc pitoc mitowi « Town Lattice Mode » naha pactone askik ka otcitc Ithiel Town ka ki ocihatc 1820 ka tatopiponikak.

Kiapatc anotc kata ki acokeparinaniwon e icaniwok nete « Parc Ducharme » Bostonnais itekera kitci nta metowaniwok acitc pamotaniwok notcimik e nipik e pipok tca kitci nta cocokwaniwok acitc cockwatahaniwok.