Ickote otapan meskano taci mocak e miparinaniwok. Montréal otciparin nac Haute-Mauricie.

ICKOTE OTAPAN MESKANO

Québec askik, ickote otapan meskano ki miro apatan ocki otenowa kitci iti mitceki acitc awocamec ki iti takono otamirowina.

Ickote otapan meskano e ici miparinoniwok Québec e otciparik nac Lac-Bouchette. Ni apitc 1887 nac 1890.

Kirowe kitci pecinakok

Wiec 1870 ka tatopiponikak, Horace Dumais ki nataweritamowew Québec askik kice okimawa kitci ickote otapan meskanakaniwok icikowisk Saguenay-Lac-Saint-Jean kitci iticimok. Matanak « Laurentides » ka icinikatek ki ici micimotakaniwon. Kirowe tca peciwon Saguenay-Lac-Saint-Jean e wi icaniwok kaie kirowe wetan Mauricie askik notcimik e pe icaniwok kaie sakihikanik e wi nta wepahapaniwok. Nictam ka takok ickote otapan meskano, Saint-Raymond otci matceciminopan nac Roberval, Lac-Édouard e ki iti micimok. Irinatikw ki apatisiw acitc micta piwapiskw ki mapiskititakaniwon. Ickotok ki arimiparin kitci ki apatak ickote otapan. Kice okimaw ka ickwa pikitanak coriariw 1885 ka tatopiponikak ekoni patam ka miroparik.

Nictam ka ki pe itatiketcik

Lake Edward pehokomok ki kictapatan otci Mauricie aski. 1886 ka tatopiponikak ki mitcetiwok pactonewok ka ki pe kapatcik ickote otapanik e wi pe nta kwackwepitatcik macimekosa awocamec 10 e tatotawatcikanesiritci. 1907 ka kictakaniwok ickote otapan meskano Québec e otci matcecimok nac Lac-Saint-Jean ka ici takocicimok. 1910 ka tatopiponikak nictam ka pe itatiketcik Parent itekera ki manikasowok ite ke ici micimok ickote otapan meskano. 1913 ka pe takociparik nictam ickote otapan neta Parent.

« Clubs privés » atisokan

E ki miro apatak ickote otapan meskano ki iti micta mitceno « Clubs privés » ka icinikateki. Mitowi nihi : Laurentide House, Paradise Fin and Feather Club- anotc Lake Edward Fish and Game Club ka icinikatek. Ki actakaniwon onimiski ickote mikiwamiskak acitc miskomiwoca kaie mitcet tcimana acitc towekana. Ni apitc, ki micta coriakemakan nihi « Club privé ». Ki otamirohakaniwiwok acitc ki mirakaniwiwok mikiwamiriw ke ici taciketcik aniki ka ki pe itatiketcik. 1945 ka tatopiponikak kirawe nehirowisiwok ki akacehwok pactonewok kitci pamohorikotcik e wepahapetcik.

E mirowinakok e pamiparinaniwok

Anotc aci Canadian National tiperitam ickote otapan meskanariw. VIA Rail tca anotc pamiparin Montréal nac Jonquière (Lac-Édouard iti nokiparin) kekotc Montréal nac Senneterre ( La Tuque-Parent acitc Clova iti nokiparin).

Atita pactonekiwama notcimik e ici takok, ite e ici miparik ickote otapan, nanikotin iti kipaniwon kekotc pe posinaniwon. Otcitakotc actew kitci posinaniwok ickote otapan kirake peikwaw esko matisinaniwok.