Pictepiapiskw ka ici ocitakaniwok neta La Tuque 1942, anotc Rémabec tiperitam.

KIRAWE KITCI ITI MICATAKANIWOK OTENO.

Ota La Tuque e notcimiwok acitc e mitcek sipia kaie sakihikana ki ici pakoserimonaniwon kitci ki awocamec mitcek otamirowin kirawe kitci ki coriakaniwok.

Wikwasatikw apatisisw mictcikoca e ocitakaniwok.

Kice mackowisiwin

1939 ka ntoparinaniwok minawatc, Canada aski ki natamakew. Ka ki totcikatek kaskina wiec ka takok « usine » ki ocitakaniwon ke apatak e ntoparinaniwok mitowi paskisikana, kartoca. 1942 apitc nihe « Aluminerie Alcan » ki tcimotakaniwon ota La Tuque ekota tca e taci tikisikatekipan pictewapiskw aniki otci ka ntoparitcik. Ka ickwa ntoparinaniwok 1945 apitc, ekoni ka kipahikatek nihe « Aluminerie Alcan ».

Ocitakaniwon mitcet « industries »

1948 ka tatopiponikak kotak ki tcimotakaniwon « usine ». « Saint-Maurice Furniture » ki icinikatcikatew. Ekota neta e ici ocitakaniwokipan actasoniwoca kaie kaskina ka apataki mikiwamiskak : mitcisowakan, tetapiwakan…150 ki taciwok neta ka ki otamirotcik nac ka kipahikatek nicto pipona e ickwa cenikatek. Ka iti ickwaparik 1940 nihe « Saint-Maurice Knitting Mills » ki tcimotakaniwon taci ke ici ocitakaniwok cipwacte acikan iskwewok otci. Mia ni apitc kiapatc kotak « usine » ki ocitakaniwon wikasi ke ici ocitakaniwok « Cosmo Underwear » ki icinikatcikatew. 1960 ka tatopiponikak ki kipahikatew nihi e nicki.

Nipara ocitakaniwon pweteckwemok

Minawatc nihe « WestRock » ka icinikatek taci ka ocitakaniwok pweteckwemoko acitc kotakihi mitcimiwocica mitcim ka actakaniwok kitci atawaniwok. Aci awocamec 100 tatopipona esko miparik. 475 taciwok ka otamirotcik neta. Tato kicko ocitakaniwon awocamec 40 000 000 mikikwakana ka masinahikanickwemokowok acitc 15 000 000 irikik « pizza » pweteckwemok.

Wikwasatikw e irapatisitc

Esko 1979 ki tcimotakaniwon « Industries John Lewis » ka icinikatek « l’usine » micta nipara coriakatam otenariw La Tuque. 175 taciwok ka otamirotcik neta. Wikwasatikw apatisiw e ocitakaniwok mictikoca kaskina wiec ke irapatcitakaniwok mitowi kapi atehikanatikw, tipotecik « hot dog » ka icinikatakaniwitc ka sakaskotik kaie paparamanik. Micta nipara atawewok niheriw ka ocitatcik kaskina wiec e irikoskamikak.

Nihe kaie « Industrie touristique » ka itaniwok nipira coriakatam otenariw La Tuque. Mireritcikatew maka tca e pe nta arowecimonaniwok kitci ki onikaniwok ka iciwepak e matciparik ota askik.