© City of La Tuque
All rights reserved 2025
Matana mia ritic (actotin) ka icinakok, epwamoci 1939.
LA TUQUE : SOKI WITCIPIMATISINANIWON
1911 ka tatopiponikak ki mamowinikatew e niciki otenowa La Tuque ka icinikatekipan. Nicinopan otenowa ni e icinikatek. Peikw nihe « La Tuque Village » icinikatepan. Kotak tca nihe « La Tuque Falls » icinikatepan neta tca meskanak Scott ka icinikatek ici actepan notc kiwetinok nac micta sipik « Bostonnais » pecotcik Saint-Maurice sipik. Ekota e ici takociparikipan micta tcimana. Wipatc ki iti micaw « La Tuque Falls ». Ekota neta e ici tatc tackipotcikan kirika ickote otapan pehokomok acitc aiamihe mikiwam Saint-Zéphirin.
Anotc La Tuque matanak e otapitcikatek.
Ka wikokwe piskirowatonaniwok : atisokan ani kekotc tapwe?
Ani apitc nihi e niciki otenowa wikokwe piskirwatopanak. Ki motesikatepan « aqueduc » ka icinikatek ocki anotcikwetc e ki kictakaniwokipan. Ki itactohorakaniwok aniki kotakihik otenak ka tacikewaspan kaie wirawaw e taci ocitakaniwonikipan mekwata otenamiwak. Ki wi kiskeriten a nihe e itatisokaniwok? Kiapatc anotc nokon taci e ici actekipan nihe « aqueduc » neta notcimi meskano matanak ka ici pamotaniwok ota Ski La Tuque.
Takopita kiritcik
Kekwan wetci ki icinikatek La Tuque nihe oteno? Peikw iriniw Jean-Baptiste Perreault icinikasopan ki atisokew e ki pamatisitc ota. Ki masinahikew e atisoketc ite ka ki pa icatc. Ki wapatam matanariw mia pipon actotiniw e ki icinak, ritcik ka icinikatek. Enkweriw ka ki noswapatak kitci ki takocinik ota. Anotc tca matci icaniwon neta matanak kitci nta kanawapamakaniwitc micta kipahikan.
Nictam ka ki pe itatiketcik
Kotak iriniw, Jean-Baptiste Tessier icinikaso, wirictam ka ki pe itatiketc ota 1861 ka tatopiponikarik. Minawatc Adolphe Larue, Trois-Rivières ki otcitew e pe itatiketc ota pecotcik sipik Croche ka icinikatek. Kek ki iti mitcetinaniwon e pe itatikaniwok. 1863 ka tatopiponikak aci awocamec 12 tatotenowesipanak ka taciketcik ota La Tuque. Ki mamowinikatew anotc kaskina otenowa ka takoki Mauricie askik. 30 000 km irikwaskamikaw, 15 000 tca irikik tacinaniwon. Itaniwon tca mawotci micaw La Tuque oteno ota Québec askik.