Mitcetiwok ka pe icatcik St-Maurice sipik e p enta arowepitcik.

SAINT-MAURICE SIPI ATISOKAN

Patam 1535 nictam ka petakaniwok e arimotcikatek nihe sipi. Jacques Cartier ka koski pe takocik, wirictam ki wapatam niheriw sipiriw mekwata e mahokotc micta tcimaniw ite e ici matapetciwonik. Ki orinikatam « La rivière de Fouez » ki icinikatam. Nama kiskeritamopan aci weckatc Atikamekw nehirowisiwok e ki icinikatakik Tapiskwan sipi.

1723 ka tatopiponikak ki orinikatcikatew nihe sipi. Saint-Maurice ki icinikatcikatew. Maurice Poulin de Lafontaine icinikasopan iriniw e ki mirakaniwokopanan askiriw « seigneurie » ka icinikatek kitci mitatc. Akam sipik nakapehonok ici actepan nehe aski. Ekoni wetci ki icinikatek Saint-Maurice nihe sipi.

Mahapotcike iriniwok St-Maurice sipik, 150 tatopipona irikik mahotcikaniwon. Neta opitc 1933.

Sipik e mickaniwok

Epwamoci 1800 wiec ka tatopiponikak tepirak wikwas tciman apatanopan wiec e wi icaniwok. Epwamoci pe takocinitcik pakwe emitcikocicak, nehirowisiwok kiskeritamopanak ite ke icitcimetcik e nta wepahapetcik kaie ntohotcik acitc ite ke ici kapatakaniwonik. Mocak kaie ki mickawok e kiwotetcik kotakihik nehirowisi otenak kaie e nta nakickotatotcik kitci mameckotonamatotcik e ici titakik.

Micta kiciparinaniwon

Arimatc ki miro kiskeritcikatew e aicitciwok e matcehonaniwok neta sipik 130 km e asitci kinowantciwok Grandes-Piles e otci matcehonaniwok nac La Tuque e ici macikaniwok. 1852 ka tatopiponikak ki takon nictam ickote tciman « Compagnie Norcross et Philipps » e ki pakitinak kitci ki iciworiwetc La Tuque. Pitama ickote otapan « St.Maurice Railway and navigation » pe takociparinaniwonopan Grandes-Piles minawatc ickote tciman posinaniwonopan nac La Tuque.

« Pitoune » atisokan

150 tatopipona irikik ki maporakaniwok sipik mictikok e ki kickahaskwaniwok nac tackipotcikanik e ici takocapokotcik. 1996 ka tatopiponikak aci ponitakaniwopan e maporakaniwitcik mictikok Ota Québec askik, Saint-Maurice sipik mamotcitc ka ponitakaniwok ni e totcikatek. Aci nama mahapotcikaniwonopan nihe aric sipi kiapatc otamiromakan e micta mitcetitcik micta kipahikanak ite e otciparik onimiski ickote.Tato nipino pe mitcetinaniwon e pe nta arwecinonaniwok acitc wepahapaniwok. Mitcetiwok namesak neta sipik La Tuque nac Trois-Rivières (42 espèces) micta tca kwackwepisowok.