Weckatc « l’usine » witcicanak Brown ka ki tcimotatcik, anotc aci WestRock icinikatew ota La Tuque ka actek.

WITCICANAK BROWN KA ICINIKASOTCIK

Sakihikanicik Saint-Louis ka icinikatek ekota neta nictam ka ki ici manikaniwok kitci taciketcik ka ki pe itatiketcik ota. Enko niki witcicanak Brown ka icinikasotcik ka ki pe takocinitcik nictam.

Ka itapiskititakaniwok nipi ke otacikowik nete sakihikanik Parker e otacikowik neta « l’usine » ka ici actek.

Micta kipahikan. « usine » acitc masinahikanickwemok « Kraft »

New Hampshire pe otatepanak Pactone askik itekera. Aspin 1865 ka mihawakopane tackipotcikana nete. Ki petakewakopan e micta notcimiwonik ota kaie e mitcenik sakihikaniw acitc sipiriw. 1904 nictam ka pe icatcik ota e pe nta wawapatakik kitaskinariw. Ki tca ocitawok « Québec and Saint-Maurice Industriel Company » ka icinikatek ki tca mirakaniwok pawoctikoriw kitci otamirotatcik. 1907 ka tatopiponikarik aci tiperitamopanak askiriw e notcimiwonik ota Québec aski. 1909 ki kitciparinaniwon e ocihakaniwitc micta kipahikan acitc « une usine » masinahikanickwemok ke ici ocitakaniwok. Brown Corporation ki icinikatew 1917 ka tatopiponikak nihe « l’usine ». Ekota nictam ka ki ici ocitakaniwok masinahikanickwemok « kraft » ka icinikatek ota Canada askik 1928 ka tatopiponikak.

1935 ki itapiskitcitcikaniwon nipi kitci itacikowik nete ka ici ocitakaniwok masinahikamickwemok kirawe kitci wapackwemakacik. Nete tca sakihikanik Wayagamac e otacikowik nihe nipi. Ki kice misikitakon ka itapiskitcitcikaniwok, 13 km maka tca irikik ki asitci kinowaw. 1940 ka tatopiponikak aci itapiketinopan onimiski ickoteapi otenak.

Miro iriniwok

« Ki caweritakosinano kitci misikitaikw, kaie kirano tca ki ka caweritcikanano. » mocak itepan naha peikw witcican. E nipa aimihaniwonik tca tato pipona mirakaniwipanak peikw micirewa aniki aci ka ki nipowitcik ka otamirowaspan neta. 1920 ka tatopiponikak ki ocitakaniwon natokohokomok kaskina awik otci ota otenak. Ni apitc kaie ki ocitakaniwon « une ferme » ka icinikatek. Tato kicko, 500 kwapahikan tcotcocanapo irikik mirakaniwipanak ka kitimakisitcik.

Nac ki iti micaw nihe oteno La Tuque. Aniki witcicanak Brown ki tcimotawok aiemihemikiwamiriw St-Andrew acitc kiskinohamatokomokoriw High school. Ki miro iriniwok aniki witcicanak Brown. Ki kicteritamok kiskinohamasowiniw, aiemihewiniw kaie e ici metowaniwonik. Kiapatc micimoniw omeskanakaniwaw notcimik ke ki ici nta pamotaniwok, pamiparinaniwok tetipapickatcin acitc skito. 1908 ka tatopiponikak acokan ki ocihakaniwiw matci kaskina awik kitci pa icatc notcimik.

Ite e ici mirowacik kitci tacikaniwok

1954 ka tatopiponikak « La Brown » ki atawew ka ici titakipan. Anotc tca aci « Westrock » tiperitam. Sakihikanicik Saint-Louis kiapatc pe takocacikoin takikamapo nete Wayagamac e pe otacikowik. Kirawe tca wapackwemakacin masinahikanickwemok ka ocitakaniwok, Mocak tca tawok kiapatc ka otapinakik.