Atikamekw nehirowiskwew pikikitam wikwas tcimaniw. Awaca taci kanawapamiko.

ATIKAMEKW NEHIROWISIWOK

Ota Haute-Mauricie nehirowisiwok otenamiwak ka taciketcik Atikamekw iriniwok icinikasowok. Kotc e tatotenowesitcik takoniw tipirowe otaskiwaw ke ici ntohotcik, atosketcik, wepahapetcik acitc mowisotcik kaie notcimi mickikiriw ke otinakik. Mocak ekoni ka ici pimatisitcik kitci ki matcihawosotcik. Mocak tepirak ki motci witamowewok onitcaniciwawa e ici pimatisitcik nehirowisiwok.

Kakone pisiw tatopipona takon Pow-wow Wemotacik. Nakickotatonaniwon e kicteritcikatek nehirowisiwin.

Okimaw acitc ci

Emitcikociwicak nictam ka pe takocinitcik, ki kiskerimewok Atikamekw nehirowisiwa ki tca mocak mameckotinamatowok e ici titakik kekociciriw. Nictino otenowa Atikamekw nehirowisiwok e ici taciktcik : Opitciwan, Wemotaci et Manawan. Mitaperotinik nictam ki tacikewok nac ki iti nta tacikewok otaskiwak napitc cawonok itekera.

Ka ici meckotonikaniwokipan

Pakwe emitcikocicak,akamik kitcikamik ka pe ototewaspan micta natawerimepanak amiskwana enkweriw tca ko ka meckotanamakewaspan. Kek « la Compagnie la Baie d’Hudson » ki pe takocinomokon. Nictam nete Rivière-aux-Rats 1685 ka tatopiponikak minawatc La Tuque 1700 ka tatopiponikak.

E nikotwa-tciwok estakok

Mocak ki nosanetawok e estakonik e pimatisitcik Atikamekw nehirowisiwok. Ki kiskeritetawaw a 6 e tatinik estakonik wirawaw nehirowisiwok? Mocak ki pamatikewok kotc e estakonik e kiskeritakik ite ke icatcik kitci ki itotisketcik tan wa aitotakik. Ki wi kiskeritenawaw a e aicinikateki estakoki? E ickwa nipik (été) aci takwakin (automne), minawatc pitcipipon (pré-hiver), pipon (hiver), sikon (pré-printemps) acitc miroskamin (printemps).

E icinakok Atikamekw arimwewin

Atikamekw nehiromowin kirawe kiapatc arimwaniwon patak kotakihi nehiromowina. 95 % Atikamekw nehirowisiwok kiapatc arimwewok otarimwewiniwaw. Micta miro nisitotakoniw tan wa itetcik, mitowi awesisa e wiratcik mia naha kekekw (faucon) acitc ohomisiw (hibou) e ititakositc e kitotcik ekote ni ka icinikatatcik. Ki kiskeritetawaw a enko ni tepirak Atikamekw nehiromowinik ka apatak R(re), mitowi emitcikocimowinik? 1986 ka ocitakaniwok « l’Institut linguistique Atikamekw » (ILA). Ki tawok ka ki otamirotatcik tapickotc kitci itactakaniwok e masinahikatek itewina acitc ocki itewina kitci ki witcikatek ocki kekocica aka ka takokipan weckatc mitowi otapan,(auto) kinokepitcikan,(ordinateur), ka masinacteparicik (télévision).

Anotc tca mitcetiwok Atikamekw nehirowisiwok e taciketcik otenak La Tuque. Irikik e tacitcik emitcikocicak, 23 % irikik taciwok Atikamekw nehirowisiwok. Peikw nehirowisiw tatwaw e newitcik emitcikocicak, ekote e ici akimakaniwitcik. Miroparihitowok e mamo taciketcik.